De greislign Leid vom Doaf

Josef Hubert Bremmelsdorf (Sepp)

Des bin Ih! I laff imma im Woid ummanand und mog mei Birn und ah de frische Luft. Ih wohn scho imma in Brummskirchn und hob a Hüttn im Woid. Ih bin gean im Woid und a beim Bartl, dem gwampattn Wirt. Ois Ih a junga Mo wor hob ih imma auf de Rosi aufbasst und voam greislign Biagamoasta beschützt. Ois gonz gloana Buah bin ih imma zum Säh und hob mid meim Freind – am Walla – gred. I bin a ehrliche Haud und mogs gern ruhig und gmiatlich. Lebn und lebn lossn. Aba wenn oana si sauba danebn benimmt ko ih mia des ned long ohschaugn, dann muass i handln. Leida kimmd des vui zu oft vor bei uns. Dehre!

Hias

Da Hias is mei oida Spezl. Eah wohnt in am pfundign Haus mid Blick auf de Berg. Ea is a richtiga Profi mid de Kompuata und mochd imma de Sepp Fideos und ah die Musi. Ih geb eam de gonzn Gschichtn auf oide Zeddl und ea mochd dann sei Kompuata Zeig und duad des ins Intanet nei. Da Hias und Ih laffan oft zammat durchs Doaf. Ea mog sei oide Kamara so gean doss er se imma um sein Hois drogt.

Hans

Da Hans is a geidiga Baur ausm Doaf. Ea hod scheene Hehna und schloffd sogor in seim Bett mid seim Huad auf. Aufm Nachtkastl is a Hehnalampn, hahahaha. Sei gressta Stoiz is aba des Bummerl, sei riesn Stier. Da Hans duad ma oft heiffa, wenns brennd. Und Ih heiff eam ah, wenns iss.

Biagamoasta

Da elendige Biagamoasta is a druchtriebene Luschn. Ea hod frira durch zoihn vo Geid an de Leid im Doaf sei Amd griagt und nimma valassn. Er hossd olle Kinda und hod de Rosi frira drangsaliert. Ih hob se imma voa eam bschützd. Ea hod imma krumme Dinga draht und imma gschaugt doss ea Geid aufd Seitn schaffd. De Rosi woid eah zum Heiron zwinga, aba des hod sie midgspuit und sauba als Rache plant. Mid de Feialöscha bi Ih und da Brosi auf eam los. Voa longa Zeid hod ea mim Schorsch Foischgeid gmochd, dann hod ea an Schorsch vapfiffn. Dea hod si in da “Geisterstunde” grächd und da Biagamoasta is ins Zuchdheisl ganga. Moi schaugn wia lang ea do drin bleibt.

Schorsch

Da Schorsch is a echta Vagabund und Vabrecha. Frira hob Ih mid eam Doafstreiche gspuit, nix heftigs, nua a Schmarrn. Aba dann woit ea mehra und woit a Autloh sei, wia bei de Amis. Noch dea Gschicht mid dem Foischgeid is ea vahaft worn aba mittlaweile wida frei. Ea is hoam kehma und hod an Biagamoasta zum Zwoakampf herausgfordat , Ih hob des mim Odlfass untabundn. Dann is ea mim Feiastuih abdampft aba Monate spada wida kehma – Ois easts hod ea si beim Biagamoasta grächt und eam im oidn Stadl ans Seil bundn wo ih und des Dammerl (Bolizei) eam gfundn hom. Spada is ea wida in sei Hausi zogn und vadient Geid mit seina Schwarzbrennerei, hahahahahahah!

Ambrosius Preuss (Brosi)

Da Brosi is in Brummskirchn aufgwachsa – zammat mid seine gloanen Schwesta Rosi. Beide homs ned leichd ghobt, aba Ih hob mi imma um de zwoa kümmat. Mia san guade Freind. Da Brosi hod vom Hias ois üba de Kompuata glernd und de hom imma ois neie ausprobiat. Mia wor des sauba wurschd. Aba spada is da Brosi nach Minga ganga und hod mid da Rosi a fette Bude aufgmochd: BROS IT. Die hom sauba Geid, fohrn an Porsche und kehman manchmoi in Brummskirchn vorbei. Da Brosi sauft gean an Schnaps und mog des scho seah. Mid eam zamm hob ih am Biagamoasta mid de Feialöscha oans ausgwischd ois ea de Rosi heiron woit. Da Brosi is wia a gloana Bruada für mi.

Rosalie Preuss (Rosi)

De Rosi is de gloane Schwesta vom Brosi und is a Liabe (und sauba fesch). Ois Kind hod sie vom Biagamoasta imma oans draufgriagd. De Sau wor so fies zu ihr doss Ih se imma voa eam gretted hob. Rosi hod sauba wos in da Birn und hod mim Brosi zammat de Bude BROS IT in Minga aufgmacht. De Rosi kimmd imma moi wida zu mia und wir ratschn dann stundnlang. Um si am Biagamoasta zum rächn hod sie eam in a Falle glockt. Sie hod so doh, dass sie eam heiron mechd und ea is drauf neigfoin. Ia Plan hod darauf basiat doss ih se imma voa dem Depp bschütz. Ois ea sie eigsperrt hod bin Ih mim Bummal und am Brosi kehma und hob dem Biagamoasta sauba eigschammt mim Feialöscha.

Harri

Da Harri hod a Metzgarei – Harri is Kini. Ea is a Schnapslbruada und imma bsuffa. Frira wor ea a Moasta vom Lebakahs. Aba jezad is sei Metzgarei so greislig worn doss ma do nix mea kaffa ko ohne dass ma speibm muass. De Leid sann ah scho nimma so freindlich zu eam. Ois ea sein ranzlign Lebakahs in seim Standl vakaffa woit hom se den Wong mid Steckn und Stoana zerlegt. Ih hob an Harri nauszogn und sein Höllentrank (Schorschs Brombeerschnaps) den Leid higschmissn. Da Harri war so bsuffa doss ea nix mea vastandn hod. Daraufhin homs vom Wogn obglossn und hom den Schnaps zamgsuffa. No liaba ois da Lebakahs is den Deppn da Rausch, so is des hoid in Brummskirchn.

Bartl

Da Bartl is da Wirt vo Brummskirchn und gammet in sein seina Boazn “Gasthaus zur Gemütlichkeit” ummanand. Im Kella vo da Boazn is da Musi Kella wo i amoi aufgspuit hob, des worn Zeitn. Ea is sauba abagleibisch und sigt imma Gschpensta und gruseligs Zeig. Ea mog sei Soachbräu seiba so gean sauffa und a an Schweinsbron fressn. Deswegn is ea so gwampatt. In da “Geisterstunde” hod ea denkt doss da Biagamoasta am Seil im Stadl vom Hans a Laich war. Der Depp, hahahaha. Aba sei Herz is am rechtn Fleck. Beim Bartl trffn si imma de gonzn schiachn Deppn aus Doaf (Ih ah) zum ratschn und zum Feiaobnd.

Dammerl

Des Dammerl is da zahnluckatte Doafbolizist. Ea hod sei Gwand imma sauba fleckig und riacht ned so guad. Ea is a bissal deppat und foahrt imma mid am oidn Bolizei Traktor im Doaf ummanand. Sei Uniform is so oid und oreidig doss Wappal ned aus Bayern san (sondan aus China) Auf da Seitn feiht des “I” im Wappal, do steht nua “POLIZE”, hahahaha. Ea mog a den Bartl und den Schnaps recht gean. Ois Ih de Oar beim Hans gnomma hob is ea beim mia hintahealaffa ind Mistgruam neigfoin. Dann hod ma nimma sein eigenen Pfuideife grochn sondan nua den Mist, wor gar ned so vakehrt. Des Dammerl is aba a liaba Buah und des Guade is, doss ea oam ned bähs is. Ea nimmd des mit dem Rechd ah ned so genau. Sei gresster Triumpf wor an Biagamoasta in der “Geisterstunde” zum eisperrn. Am End sitz ma oft zammat und futtan Pfannakuach in meina Stuabn.

Flori

Da Flori is da Dorfpfarra. Ea vasteckt in seim Kelch imma den windign Fusl (Edler Tropfen Rotwein) und sauft den de gonze Zeit. Imma is ea gscheid und duad so ois ob ea Ongst um seine “Schafe” hod. Dabei wui eah nua a Geid griang. Dea is so a Depp. Und am End is ea a Teil von Schorschs Schnappsdistribution. Bei eam untam Altar lagert des Zeig des ea dann seine “Schafe” weidagibt – mid am sauban Aufschlog. Da Brosi kafft imma beim Flori den Brombeerschnaps.

Zipfehn die aufdaucha oba ned vui zum Sogn hom

Dramma Mihi

Da Mihi is da Dramma vo The Mighty Braindead. De Band spuit a Mighty Sepp Songs live.

Sänga Mihi (A ah Mihi)

Da Mihi is da Sänga vo The Mighty Braindead. De Band spuit a Mighty Sepp Songs live

Da Hackl

Da Hackl is a Freind vom Dramma Mihi und lafft imma amoi bissl umanand. Mid seim Ope Vectra 2.0 Turbo LPG roast ea imma sauba üba de Strossn. Ois de Leid Harris Wogn zammahaun bringd ea an Korb Lebakahssemmen vorbei und schmeisst se den Leid voa de Fiass.

Heinz (Thuri)

Da Heinz is a schiacha Saufbruada vo weid weg aus Deitschlond. Ea kimmd noch Brummskirchn wega dem Soachbräu und unsan weiban. Doss de weiba eam weidahaun is äh klar. Dea is so deppat und schiach doss sogor de Viecha weglaffa. Da Wall hod eam sauba vaschreckt und des Bummerl hod sein oreidign Campinfwogn umgrissn. I hoff dea kimmd nimma zu uns.

Hugo (Thuri)

Da Hugo is da fette Freind vom Heinz. Beide gammen am Campingplatz Soachn ummanand und vaschrecka de Viecha im Woid. Ea speibt a gean in unsan scheenen Säh. Zammat mim Heinz rennd ea dann vom Bummal daffoh. I hoff ah, doss ea nimma wieda kimmd.