
Mei Hüttn
Des is mei Hüttn – de is so schee. A ruhiga Ort im Woid, ned weid weg vo Hans seim Hof. An Kilometa durchn Woid und ih ko mia de Oar hoin. I hob ah an Kella wo ah mei Bett is. Da untn is ah mei Kohlekella wo ih gean schaufe. Obn in da Hüttn hob ih a Stuam mid am Ofa und am Dihsch. Gmiatlich im Winta. Im Somma san de Muckn aba greislig.

Mei Bett
Des is mei Bett im Kella. Do untn dua ih schlaffa und ah imma bissl rumwurschtln.

Mei Stuam
Gmiatlich, oda? Ih dua so gean Pfannakuacha essn, de moch ih dann am Feiaofa. im Winta beim Liad “Der Dieb” hob ih am Hans Oar glaut weil ea ned do wor. Des Dammerl is dann ind Mistgruam neigfoin. Am End worn da Hias,Hans und des Dammerl bei mir zum Pfannakuacha essn. Des wor so bärig und mia ham vui gratscht und glachd.

Mei Kohlekella
Sauba staubig und dreckad. Aba ih dua da untn gean schaufen und obschoitn. Im Liad “Schwarzes Loch” hod da untn imma des greislige Händi bimmlt. Des hob ih dann glei mid a Schnur ins dunkle Loch neigschossn. Donoch wor wiada a Ruah! Bärig!

Hans Hof
Do wohnt da Hans mid seine Hehna und am Bummerl. Schaugts wos des füah a riesn Hof is! Da Hans is a Geidiga! Und ea hods imma recht wichtig. Aba heifa duad ea mia imma wenns brennd! Und ih eam!

Hans sei Schloffzimma
Schaugts Eich des amoi oh, hahahahaha. Da 150 Kilo Hans schlofft mid da eigschoitenen Hehna Lampn. An Huad duad ea ah ned runta wenn ea ins Bett geht. Soa muass des in Brummskirchn sei!

Bummerls Stoih
Da Stoih vom Bummerl beim Hans seim Hof. Schaugts Eich de boarische Kistn oh, do drinn hod da Hans sei Geid drinna ghabt. Da Biagamoasta hods Bummal nauslossen und woit des Geid nehma. Aba des Bummerl hod draussn aufn Biagamoasta gwart. Wo donn bassiert ist segts im Fideo “Der Stier“

Ausfahrt Soachen
Do gehts naus wenns Iah noch Brummskirchn forn woits.

Ortsschuidl
Do ko ma ins Doaf neifahrn. Brummskirchn ghert zu Soachen, a gloane Stohd am Säh und am greislign Campingplatz. Noch Brummskirchn laff ih a guade hoibe Stund vo meina Hüttn aus.

Doafblotz
Do siggts de Kiach vom Flori und ah den Musilodn, dea ah de Musi vo mia ins Intanet neilodt! Im Winta bin i do sauba ummanandglaffa und hob Bartls Geschpenst gsuachd. Am End wors nua a bsuffana Preiß im Eck vom Wirdshaus.

Bartls Gasthaus
Des is des legendäre “Gasthaus Zur Gemütlichkeit” vom Bartl. Frira wors amoi bissl bessa in Schuss, des kennts in da Rückblendn vom Fideo “Die Frau” seng. Da Bartl duad nimma vui herrichtn deswegn schaugt des so oreidig aus. De gonzn schiachn Deppn ausm Doaf dreffn si imma zum Feiaobnd do drin zum Stammdihsch. De Preise san hoibwegs ok, des Soachbräu is hoid sauba greislig aba da Bartl hod a imma Schorschs Brombeerschnaps unta da Thekn vasteckt, hahahahahaha.

Stammdihsch
Bei dea greislign Eckbonk beim Bartl drin treffan mia uns imma am Obnd zum Ratschn. Do hock ma zamm und hearn Gschichtn vom Bartl, Hans oder vom Dammerl. Mei, des Dammerl vazeiht imma vui wenn da Dog lang is. Bei dem Dihsch hod da Bartl im Fideo “Die Geisterstunde” a von da Laich im Schtodl vazeiht, dea abagläubische Zipfeh, hahahahaha. Am End wors nua da elendige Biagamoasta, dea des Foischgeid hoin woit.

Musi Kella
Im Kella vo Bartls Wirdshaus is da Musi Kella. Do untn werd sauba grumpet. Ih hob da ah scho amoi aufgspuit, im Winta. Olle worn do. Des wor schee! Im gloanen Klipp “Da Biagamoasta” kennts Iah mi im Kella ummanadlaffa seng

Oide Markdstross
De oide Marktstross füaht direkt zum großn Sandplatz, wo da Harri sein Lebakahswogn hod. In da Stross gibts Harris ranzige Metzgarei und an gloanen Eikaffa. Frira wor de Stross amoi schee, jezad is ois bissal greislig. Aba wenns Wehda guad is hod trotzdem an Scharm

Harris Metzgarei
Do liegt eah! Da Kahs des Untagangs, Herr da Fliang, Block des Grauns, Brutstättn vom E-Koli und am Noro. De Metzgarei is so greislig und gschtingad doss ma des do drinn ned aushoitn ko. Da Harri merkd des ois nimma, dea is nua bsoffn und gammet neba seim Kahs ummanand. Pfuidepp! Schaugts Eich des im Fideo “Leberkas” oh, wia da Hirri mid da Hand auf des Brät klatschd, do gibds koane Worte dafüah.

Harris Lebakahswogn
Des Teil is so oreidig doss es scho wida bärig is, hahahaha. I dad nie und nimma beim Harri wos fressn, de Fliang san scho ummanand und es riacht a ned guad, bessa gsogd es grabet übaroi – Pfuideife!!!!! Frira wor da Harri a subba Metzga – des kimmd am End raus wehma zfui saufft! Lossts des bloß bleim! Im Fideo “Leberkas” kennts Iah des ois ohschaugn

Schorschs Haus
Schaugts Eich des amoi oh! In seina Hüttn duad da Schorsch den Schnaps vastaun. Und ih hob goar ned gwusst doss ea so a Buidhaua is. Sakkrament! Bei “Die Grube” bin da amoi higlaffa und hob de Statue gseng. Zammat mid Schorschs “Da Doud” auf seina Jackn hob ih dann nchm Foin vom boarischn Mech drammt. Greizsacklzement!

Haus vom Biagamoasta
Do drin hod da elendige Biagamoasta seine krummn Gschaftl gmochd. Da drin hod ea an Schreibdihsch mid Goidmünzn drauf. Und de Dihr hods Bummerl in “Die Frau” puivarisiert. Dann san da Brosi und Ih mid de Feialöscha nei und hom den Zipfeh eigschammt, ahahahaha. Des Schuidl an seim Haus is so schlimm. Dea duad so ois ob ean ondre intressiern. Dabei mod ea nua si seiba und des Geid. Aba jez is ah eh im Zuchdheisl beim Dammerl.

Dihsch vom Biagamoasta
Do hod da Zipfeh ghockt und hos sei Geid zeiht. Do hod ea ah seine brunzdeppatn Zeddl gmochd. Den Heirodsvadrog vom Liad “Die Frau” und ah den Mastaplan füas Glaun vom Geid vom Hans im Fideo “Der Stier“.

Camping Soachen
Frira wor des a scheena Blotz wo de Kinda gspuit hom. Aba jezad is des die Mistgruam vom Säh. De Thuris schmeißn erna Scheisdreck übaroi hi und biesln in jede Eckn. Dea Wohnwogn ghert am Hugo und am Heinz. Des Bummerl hod des Wogn im Fideo “Walla Walla” zalegt. Sauba aufgrammd hod des Bummerl, hahahahaha. I hoff, de zwoa zahnlukkatn Thuris bleim füa imma weg vom meina Hoamat!

Grillblotz
Direkt am Säh is da pfundige Grillblotz. Do hockn mia schiachn Brummskirchna monchmoi im Somma griabig zamm und schaugn aufs Wossa. Wenn koane Thuris do san is des a ruhiga Blotz, sauba und schee. Des Hoiz füa an Grill hoi ma direkt im Woid, aba nua des Hoiz des am Bodn liegt. Mia san ja koane Röma

Eikaffa
Des is da neie Eikaffa! Do ko ma ois kaffa, a fegane Wurschd, Pfuideife! Und am schlimmstn is doss da so Kassn san wo ma des seiba eitippn muass. So a Ess Beh Zeig. Mei! Im Liad “Würste der Hölle” bin ih zum Eikaffa glaffa und woit nua a Wurschd hom. Am End hob ih des Ess Beh mid meim Stog zammaghaun und bin in mein Kella glaffa, hahahaha. Ih geh jez nua no zum gloanen Eikaffa in da Markdstross. Schaugts Eich amoi de Fahna oh, i find da ghert a boarische hi – Iah neimodischn Männatscher – hauds ob!

BROS IT – Minga
Des is de riesn Bude von da Rosi und am Brosi in Minga. De hob des voah zwonzg Joahr aufbaud – East in am Kella. Des is so guad glaffa doss de Bude heid vui Geid mochd. Gähd aba nua weil de zwoa aus Brummskirchn sann und a guads Herz hom.

Hias – Kompuatazimma
Mid dene Kompuata mochd da Hias aus meine Zeddl und Ideen de Musi und de Fideos. Wira des mochd woaß Ih fei ned. Aba da Hias woaß scho wos ea mochd, hahahahaha.

Hias – Hausi
I find da Hias hod des scheenste Haus in Brummskirchn. Ea hockd aba eh nua an seine Kompuata rum. Schod ums riesn Haus.
